www.stellingia.nl
Stellingia is de ni’je webstee van de Stichting Stellingwarver Schrieversronte in Berkoop. Op Stellingia zal op termien et Kenniscentrum van dit instituut veur streektael en streekkultuur digitaal in te zien wezen.
Op de thuusbladziede van Stellingia kuj’ makkelik vienen waor aj’ naor op zuke binnen.
Mitien onder de fotoslider ziej’ een tal heufdzaeken vermeld staon. Aj’ daor op klikken koj’ mitien bi’j et onderwarp uut en kuj’ deur te skrollen bi’j et deur jow zochte onderwarp kommen.
Links bovenan ziej’ de hieltied een zuukfunktie staon. Aj’ daor een trefwoord plaetsen koj’ in de artikels terechte waor et je om te doen is.
Saskia Douma, mitwarkster veur et Kenniscentrum in de archiefruumte
Et Stellingwarver tiedschrift De Ovend is douk hielemaole digitaal in te zien, en het een handige eigen zuukfunktie. De eerste helte van de goed veertig jaorgangen bin al op Stellingia te vienen. Op termien zullen de onderwarpen van alle artikels (inkl. verhaelen en gedichten) in een alfabetisch overzicht op naeme nog makkeliker op te zuken wezen.
In de haandbiebeltheek bin arg veul boeken angaonde de Stellingwarver regio
in te zien. De boeken wo’n liekewel niet uutliend.
De Schrieversronte gaf an now toe roem 160 boeken uut. Mit naeme de boeken die al langer uutverkocht binnen staon of kommen nog op de webstee. De originele manuskripten van alle boeken, diels mit de haand schreven, wo’n allemaole beweerd.
Alle manuskripten van Johan Veenstra - van him verschient in 2015 et 26e boek - wo’n in et Kenniscentrum beweerd.
Hiel veul wark van Hendrik Johannes Bergveld wodt in et Kenniscentrum beweerd. Bergveld overleed in 1966, laeter wodden twie boekies mit wark van him uutgeven. De spelling die veur et Stellingwarfs bruukt wodt is indertied ontwikkeld deur Bergveld en wodt daoromme tot vandaege-de-dag de Bergveldspelling nuumd.
In een speciaole braandvri’je kluis wo’n alle ‘woordeboekkaorties’, zoas die indertied deur roem twintig groepen meensken invuld wodden t.b.v. et Stellingwarfs Woordeboek, zorgvuldig beweerd.
Van et vierdielige Stellingwarfs Woordeboek kan al digitaal, mit zuukfunktie, gebruuk maekt wodden.
In et Kenniscentrum wo’n ok een tal biezundere kollekties beweerd. Et gaot om die van o.e. de ammeteur-historici Gerke P. Mulder (1905-1950) uut Appelsche, Jan Hendriks Popping (1852-1927) en Hendrik Jan Popping (1885-1950) van Oosterwoolde.
In et Kenniscentrum wo’n ok een tal biezundere kollekties beweerd. Et gaot om die van o.e. de ammeteur-historici Gerke P. Mulder (1905-1950) uut Appelsche, Jan Hendriks Popping (1852-1927) en Hendrik Jan Popping (1885-1950) van Oosterwoolde.
In et Kenniscentrum is ok een butengewoon uutgebreide kollektie boeken opneumen die mit de iemkeri’je te maeken hebben.
Alle uutgiften van de vroegere Stichting Sasland wo’n in et Kenniscentrum beweerd. Van sommige boeken bin nog exemplaoren te koop.
In de ni’je studiekaemer is o.e. de haandbiebeltheek te vienen. Wie wil kan hier, nao ofspraoke, ien en aander uutzuken en/of lezen. Op de kaemer kan gebruuk maekt wodden van een komputer.
In et Kenniscentrum wo’n veul foto’s beweerd, ok die zullen dommiet allemaole te zien wezen op Stellingia. Een diel bestaot uut foto’s van aktiviteiten van de Schrieversronte, een eer diel bestaot uut soms unieke foto’s uut Stellingwarf.
Op Stellingia zullen op termien ok geluudsopnaemen te heuren wezen. Dat gelt bi’jglieks veur et radiopergramme ‘Op ’e schostienmaantel’, dat indertied negen keer deur Omroep Frieslaand uutzunnen wodde. Vlak naodat et pergramme stopzet wodde is de Stellingwarver Schrieversronte opricht.
Bi’j de Schrieversronte wodt ok uniek beeldmateriaol beweerd. Ok die film- en videobeelden bin op termien op Stellingia te bekieken.
In et Kenniscentrum is een ommeraek uutgebreid knipselarchief. Per onderwarp zullen die de kommende tied plaetst wodden op Stellingia. Al die onderwarpen wo’n onderbrocht onder de kop ‘Dokementaosiecentrum’, zoas die mitien op de thuusbladziede te zien is.